World News, መጻሕፍት

የደርግና የአስኳላ ሕልመኞች

“የደርግ ሕልመኞች በተፈጠነ ሁኔታ እየተጠናከሩ ከኮሚቴነት ወደ ደርግነት ተለውጠው የመንግሥት ሥልጣን ወደ መያዝ እየተቃረቡ በመጡበት ጊዜ በአስኳላ ሕልመኞች ካምፕ ውስጥ ከፍተኛ ግራ መጋባት ተፈጠረ፡፡ ለዓመታት ፖለቲካዊ፣ ውጊያዊና ሥነ አእምሯዊ ዝግጅታቸው የፊውዳሉን ሥርዓት ያለ ሌላ ተፎካካሪ ነጻ አውጪ በትግላቸው ለማውረድና የኢትዮጵያ ሕዝብ ታዳጊ ለመሆን ነበር፡፡ አብዮታዊ ጽሑፎችንና የጭቁን ሕዝቦች ልብ አንጠልጥል ታሪኮች ትግሎችን በአንክሮ የተከታተሉት አውቀውም ሆነ ሳያውቁ ይህን ዓላማ ከአእምሯቸው በስተኋላ ይዘው፣ ራሳቸውን የኢትዮጵያ ማኦ ዜ ዶንግዎች፣ የኢትዮጵያ ሆ ቼ ሜኖች፣ የኢትዮጵያ ፊደል ካስትሮዎችና ኢትዮጵያ ቼ ጉቬራዎች ሆነው፣ ካስገደደ ለዓመታት መራራ ትግል ታግለው፣ በጀግንነት ጥለውና ወድቀው የአገራቸውን ሕዝብ ለመታደግ የተነሱ ነበሩ ማለት ይቻላል፡፡

በሌላ በኩል፣ የደርግ ሕልመኞች ከየካቲት እስከ ሰኔ 1966 ዓ.ም. ባለው ጊዜ ውስጥ ራሳቸውን ካጠናከሩና የሠራዊቱን አንድነት ካረጋገጡ በኋላ በነበራቸው ዕውቀት፣ የተፈጥሮ ልምድና የአገር በቀል ጥበብ የፊውዳል ሥርዓቱን ማዕከላዊ ሥረ መሠረት ማናጋት ጀመሩ፡፡ ቁልፍ ባለሥልጣናትን ቀስ በቀስ በቁጥጥር ሥር እያዋሉ ዘውዳዊ ሥርዓቱን አዳከሙ፡፡ በስተመጨረሻም ንጉሠ ነገሥቱን ከዙፋናቸው አውርደው ጊዜያዊ ወታደራዊ መንግሥት አወጁ፡፡ ጉልታዊ ሥርዓትም ተንኮታኮተ፡፡ ያን ጊዜ ነው የአስኳላ ሕልመኞች በነጻ አውጪነት ታሪክ ያቀዳጀናል ብለው የተመኙትን አክሊል መቀማታቸውን የተገነዘቡትና በደርግ ሕልመኞች ላይ ቂም የቋጠሩት፡፡

የአስኳላ ሕልመኞች ቂማቸውን በልባቸው እንደያዙ ለአጭር ጊዜ፣ ከ1966 ኹለተኛ አጋማሽ እስከ 1968 መጨረሻ አካባቢ፣ ከደርግ ሕልመኞች ጋር እየተያዩ ግን ልብ ለልብ ሳይግባቡ ጎን ለጎን ተጓዙ፡፡

በዚህ ጊዜ ነው የአስኳላ ሕልመኞች፣ በተለይም ኢሕአፓዎች፣ የአካባቢውን ሁኔታ አይተው አብዮቱ መመራት ያለበት በእኛ ነው ብለው ራሳቸውን ያሳመኑት፡፡ የትግል ታሪክ ይፈቅድልናል፤ ትምህርቱም አለን፤ ፖለቲካዊ ድርጅቱ፣ ርዕዮተ ዓለማዊ ትጥቁና ትጋቱ አለን ብለው ተነሱ፡፡ ወታደሩን ናቁ፡፡ ሥራው ጠበንጃ መሸከምና ድንበር መጠበቅ እንጂ ፖለቲካ ውስጥ እጁን ማስገባት የለበትም ብለው አሰቡ፡፡ ደርግን የጥቂት ምርጥ መኮንኖች ጥርቅም ነው፤ ሥልጣንም ለመያዝ ታሪካዊ መነሻ፣ ተገቢው ርዕዮት ዓለማዊ ትጥቅም ሆነ ሕጋዊ መብት የለውም ብለውም አመኑ፡፡” (ዶ/ር ኀይሉ አርአያ፤ ‹ኢትዮጵያ እና 5ቱ ሕልመኞች፤ 2012 ዓ.ም.፤ ገጽ 57-58)

(Visited 38 times, 1 visits today)
June 24, 2020

About Author

admin


Leave a Reply

Your email address will not be published. Required fields are marked *

About Us

The Black Lion is a magazine and online media outlet focusing on the issues of Ethiopia and Ethiopian politics. To serve you best, we produce our journalism across a range of platforms, with a particular focus on politics, economy, culture, entertainment and new forms of storytelling. We’ve grown from a single Facebook page into a suite of digital products like website and into a newsletter.

Email: theblacklionafrica@gmail.com

Logo